Под пораката „Види и биди виден“, децата се потсетија внимателно да го набљудуваат сообраќајот пред да преминат улица и да користат пешачки премин без брзање и одвлекување на вниманието. Посебно внимание беше посветено на некористењето мобилен телефон и неносењето слушалки при преминување.
Практичните примери го опфатија и движењето по тротоар, како и правилото, кога нема тротоар, да се оди по левата страна на коловозот, во пресрет на возилата. За возењето велосипед и тротинет беше нагласено користењето заштитна кацига и почитувањето на сообраќајните знаци и правила.
Средбата им даде можност на учениците да ги споделат своите искуства и забелешки за уличното осветлување, состојбата на патната инфраструктура и присуството на кучиња во Тркање. Од училиштето ја нагласија важноста на нивните согледувања, бидејќи децата секојдневно се движат низ населеното место и непосредно се соочуваат со овие услови.
Активноста ја организираа Општина Кочани и Општинскиот совет за безбедност на сообраќајот на патиштата Кочани, заедно со полициски службеници од Полициската станица за безбедност на сообраќајот Кочани при МВР. Фокусот беше на сообраќајната безбедност како дел од правото на секое дете на безбедна средина и заштита од повреди.
Светскиот ден на детето, 20 ноември, е посветен на детските права, меѓународната солидарност и заштитата од насилство, злоупотреба, експлоатација и дискриминација, со акцент на образованието, здравјето и еднаквите можности. Од училиштето порачаа дека заштитата на децата во сообраќајот, покрај нивната едукација, бара одговорно однесување на возрасните, почитување на прописите и безбедна сообраќајна инфраструктура.
Сите ученици добија сообраќајна боенка, издадена од Републичкиот совет за безбедност на сообраќајот на патиштата, Министерството за внатрешни работи и Факултетот за безбедност, наменета за дополнително утврдување на знаењата.







Коментари (0)
Коментарите за оваа објава се затворени.