Пријавата е поднесена против К.К. (22), Р.А. (24), Ф.С. (25) и Р.Б. (23), сите државјани на Турција, со привремен престој во Штип и Скопје. Првопријавениот и второпријавениот издржуваат затворска казна во „Идризово“.
Според МВР, двајцата преку Ф.С. во повеќе наврати се обиделе да изнудат пари од турскиот државјанин Џ.О. Контактите се одвивале од 09.11. до 17.11.2026 година, телефонски и преку директни средби на Ф.С. со оштетениот.
Најпрвин му побарале 100.000 евра, наводно стекнати на нелегален начин во државата, и му се заканувале и со семејството, наведува МВР. Откако Џ.О. одбил да плати, ја намалиле сумата на 40.000 евра, но тој го одбил и тоа барање.
Потоа, според полицијата, го поттикнале Р.Б. да го запали возилото. Тој е осомничен дека на 17 ноември, на паркинг на улицата „Страшо Пинџур“ во Штип, со запалива течност предизвикал пожар на „ренџ ровер“ во сопственост на сопругата на Џ.О.
Сите четворица се пријавени поради основи на сомнение за „изнуда“ во обид, а Р.Б. и за „предизвикување општа опасност“. Пријавата ја поднесе СВР Штип во координација со Одделот за криминалистичка полиција, Секторот за општ и насилен криминал и семејно насилство при МВР и СВР Скопје.







Коментари (0)
Коментарите за оваа објава се затворени.