Андоновски учествува на самитот втора година по ред, заедно со министри од владите на Романија и Полска, пратеници во Европскиот парламент и директори на меѓународни компании од телекомуникацискиот и банкарскиот сектор.
На панел за европската конкурентност во вештачката интелигенција, министерот истакна дека нејзината примена во економијата и јавниот сектор ќе биде важна, заедно со вложувањата во инфраструктурата и вештините на луѓето. Пошироката примена на технологијата, според него, е предизвик, но и значајна можност за земјите од регионот.
Андоновски оцени дека регионалната соработка може да ги надмине ограничувањата на одделните пазари и да создаде попривлечни услови за инвестиции и технолошки развој. Како понуда за инвеститорите ги наведе регионалниот пазар, силниот инженерски кадар, конкурентните трошоци и сè пософистицираната дигитална инфраструктура.
За европскиот пристап, тој рече дека регулативата е важна за довербата и јасните правила, но дека следниот чекор треба да биде забрзана примена на технологијата и поддршка за иновациите. Според Андоновски, самата регулатива не создава компании, модели ниту продуктивност.
Следните пет години, според министерот, треба да бидат посветени на вложувања во компјутерски капацитети, енергија, капитал и таленти, како и на масовно усвојување на технологијата. Тој смета дека Европа може да изгради сопствен, отворен, конкурентен и доверлив модел и побрзо да ги претвора истражувањата во производи и компании, со регулаторна рамка што ќе го поддржи нивниот развој.
Во рамки на самитот, Андоновски се сретнал и со претставници на регионалното раководство за Југоисточна Европа на Mastercard, компанија за платежни технологии.







Коментари (0)
Коментарите за оваа објава се затворени.