Како дел од финансиските обврски, Велјановски наведе околу пет милијарди евра што, според него, стасуваат за отплата во 2027 и 2028 година. Објаснувајќи ги потребите за финансирање, рече: „Тоа се пари кои се потребни за рефинансирање на долговите, камати и финансирање на дефицитот од 2,43 милијарди евра коишто се пари кои треба да се вратат во 2027 година“.
Велјановски оцени дека станува збор за тешки обврски за мала држава, која истовремено мора да се грижи за стандардот на земјоделците, пензионерите, работниците, администрацијата, лекарите и полицајците. Според него, финансиската консолидација, односно намалувањето на долговите и контролата на трошењето, не значи запирање на инвестициите. Најави продолжување на вложувањата во енергетиката и изградбата на патишта, како и зајакнување на здравствената и социјалната заштита, со намера да се создадат услови за економски раст.
Буџетите што ги предлага Владата на ВМРО-ДПМНЕ и коалицијата ги оцени како финансиски реални планови за функционирање на државата. Во тој контекст ги наведе исплатите на плати, пензии и социјални надоместоци, финансирањето на здравството и образованието, како и инфраструктурата и инвестициите што треба да ја придвижат економијата.
Во обраќањето до пратениците од СДС, кои ги нарече најгласни критичари на Предлог-буџетот, Велјановски ги обвини дека во седумте години на власт ја пљачкосувале државата и го урнисувале системот со неспособност и неработење. Им порача дека не можат да бараат граѓаните да го заборават тој период ниту да зборуваат како економијата да почнала во 2024 година.
Тој ја обвини опозицијата дека ги негира позитивните потези на актуелната власт. Посебно ги критикуваше поранешните министри, раководителите на институции и интелектуалците, велејќи дека од нив не очекува пофалби, но дека треба да ја признаат, според неговата оценка, големата квалитативна разлика меѓу економските политики на двете влади.







Коментари (0)
Коментарите за оваа објава се затворени.