Најважно
347 вести · 24 ч.
Берово 8°
Најважно
Локални вестиДемокритика
Редакција: Македонија.мкИспрати тема

Мени на Македонија.мк

Редакција:Македонија.мкНационални и локални вести
Испрати тема

На тематска дебата побаран посилен собраниски надзор врз правосудните реформи

Извор на фотографијата: Собрание на Република Северна Македонија
Извор на фотографијата: Собрание на Република Северна Македонија
  • На дебатата беше побаран посилен собраниски надзор врз реформите.
  • Телатин нагласи дека законите бараат институции способни да ги спроведат.
  • Сомер повика на доверба, дијалог и консензус за европската интеграција.

Посилен надзор на Собранието врз спроведувањето на реформите во правосудството и борбата против корупцијата беше побаран на тематска дебата за владеењето на правото и европската интеграција на Македонија. Проектниот тим на „Гласот на Собранието за ЕУ“ („PAVE“) ги претстави главните наоди што се повторуваат во извештаите за владеењето на правото, со осврт и на институционалната отчетност.

Европратеникот Томас Вајц, кој се обрати онлајн, го посочи парламентарниот надзор како инструмент за систематско следење на реформите и исполнувањето на преземените обврски. Во дискусијата беше истакната и потребата од поголема транспарентност и отчетност при нивното спроведување, како и подобра соработка меѓу институциите.

Независноста и ефикасноста на правосудниот систем, одговорноста на институциите и доследното исполнување на реформските обврски беа меѓу главните теми. Во дебатата владеењето на правото беше посочено како еден од темелните предуслови за напредок кон членство во Европската Унија.

Директорката на УНОПС, Михела Телатин, нагласи дека за одржливи реформи не е доволно само да се усвојат политики и закони, туку се потребни силни институции со капацитет и механизми да ги спроведат. Таа ја истакна важноста на техничката поддршка и институционалната координација, но и на вклучувањето на граѓанското општество, медиумите и младите во реформските процеси.

Експертска и техничка помош за институциите се обезбедува преку проектот за поддршка на европската интеграција на Македонија, кој се реализира со поддршка на Шведска и Швајцарија.

Швајцарскиот амбасадор Кристоф Сомер оцени дека надминувањето на актуелниот застој во евроинтеграцискиот процес е суштинско за напредокот на земјата и стабилноста на регионот. Тој повика на градење меѓусебна доверба, искрен и продуктивен дијалог и широк општествен консензус за најважните стратешки прашања поврзани со европската интеграција.

Сомер ја потврди поддршката на Швајцарија за европската интеграција на Македонија и Западен Балкан, посочувајќи го владеењето на правото како еден од клучните столбови на швајцарската соработка со регионот. Поддршката преку програмите за билатерална соработка, наведе тој, трае три децении.

На дебатата учествуваа пратеници и претставници на дипломатскиот кор, меѓународни организации, државни институции и граѓанскиот сектор. Покрај Сомер, Телатин и Вајц, се обратија и претседателот на Комисијата за европски прашања, Антонијо Милошоски, претседателот на Националниот совет за евроинтеграции, Венко Филипче, шведскиот амбасадор Ола Солстром и извршната директорка на Центарот за управување со промени, Неда Малеска Сачмароска.

Имате дополнителна информација или забелешка за текстот? Контактирајте ја редакцијата.

Коментари (0)

Коментарите за оваа објава се затворени.