Проектот го спроведува Првата детска амбасада во светот „Меѓаши“ во партнерство со ИМПЕТУС. Целта е одржлив и интегриран национален систем за заштита на децата и младите во дигиталната средина, преку унапредување на постојните механизми за помош, советување и пријавување штетни и незаконски интернет-содржини.
Меѓу пречките за пријавување, претседателката на ИМПЕТУС, Лилјана Пецова Илиеска, ги посочи сложените механизми на дигиталните платформи и недоволната информираност за нив, како и поврзаноста меѓу заканите на интернет и последиците во реалниот живот. Таа ја опиша организацијата како врска меѓу граѓаните и институциите. Граѓаните можат да се обратат до ИМПЕТУС за консултација и насоки за понатамошно постапување при проблеми на дигиталните платформи.
Директорот на „Меѓаши“, Жарко Змијанац, посочи дека само 0,2 проценти од постојните случаи се пријавени на СОС-линијата. Според него, тоа укажува на недоволна доверба кај младите и недоволна информираност каде и кому можат да се обратат. Застапувањето на правата и потребите на децата, како основна улога на организацијата, го поврза со неопходноста од функционални механизми и соодветни форми на заштита.
Како приоритет Змијанац го издвои унапредувањето на платформата „Ало Бушавко“ и линијата 116 – 111. Целта е тие да се зајакнат како доверливи контакт-точки преку кои децата и младите ќе можат да пријавуваат различни форми на насилство и да добиваат поддршка.
За функционирањето на линиите за пријавување и меѓународната соработка онлајн презентација одржа Клои Комсток од „INHOPE“, Меѓународната мрежа на линии за пријавување материјали со сексуална злоупотреба на деца. Презентацијата ја опфати нивната улога во откривањето и пријавувањето незаконски содржини и значењето на соработката меѓу земјите.
Во дискусијата за патот од пријава до институционално постапување беа разгледани улогите и надлежностите на Министерството за внатрешни работи, Јавното обвинителство и институциите за заштита на децата. Беше опфатено и судското постапување по предмети поврзани со материјали со сексуална злоупотреба на деца („CSAM“), со акцент на навременото пријавување и зачувувањето на доказите.
Покрај нацрт-моделот, заклучоците предвидуваат специјализирани обуки за зајакнување на капацитетите на институциите и стручните служби, подобра координација и соработка меѓу институциите и граѓанските организации и поголема информираност и доверба кај децата и младите во механизмите за пријавување и поддршка. Посебно е издвоено зајакнувањето на стручните служби во образованието за препознавање и соодветно постапување во случаи на насилство и злоупотреба. Целта е секое дете да има навремена, доверлива и соодветна заштита и на интернет и во реалната средина.
Во собраниска процедура е и Предлог-законот за заштита на малолетните лица при користење дигитални услуги и социјални мрежи. На него се осврна пратеничката и претседателка на Клубот на жени пратенички во Собранието, Јованка Тренчевска, која го отвори настанот и ја нагласи потребата од подигнување на јавната свест.
Гонце Јаковлеска, претставничка на Цивика мобилитас, рече дека нивниот сегашен фокус е премин од дијалог кон конкретни постигнувања. Според неа, веќе постојат истражувања и податоци што ја потврдуваат сериозноста на проблемот, а од ваквите иницијативи се очекува придонес кон промени и воспоставување соодветни механизми за заштита.







Коментари (0)
Коментарите за оваа објава се затворени.