Искуства и емпириски сознанија за ова влијание претстави проф. д-р Лефтерис Топалоглу од Универзитетот на Западна Македонија во Кожани, Грција. Тој беше главен говорник на свеченото отворање, а неговото излагање беше поврзано со проект поддржан од програмата „Хоризонт Европа“.
Конференцијата „AISC“ 2026 се одржа хибридно на 13 и 14 ноември, со трудови распоредени во повеќе тематски панели. Под темата „Мултидисциплинарен пристап кон целите за одржлив развој“, таа обедини академици, истражувачи и креатори на политики од земјава и странство, во чест на Светскиот ден на науката за мир и развој.
Посебна тематска сесија беше посветена на улогата на универзитетите во остварувањето на целите за одржлив развој. Годинашната програма ги вклучи и активностите на алијансата „SustainED“, чиј основач и полноправен партнер е УКЛО, за кои на отворањето зборуваше проректорот проф. д-р Горан Илиќ.
Ректорот проф. д-р Игор Неделковски оцени дека посебната вредност на конференцијата е поврзувањето на различни научни и професионални области, со постојан фокус на целите за одржлив развој на ОН. Тој го опиша УКЛО како водечки универзитет во државата во оваа област, повикувајќи се на неговото рангирање на светската листа „Times Higher Education Impact Rankings“.
Канцеларијата на Обединетите нации во Скопје беше годинашен коорганизатор и даде поддршка на настанот. Постојаната координаторка на ОН во земјава, Рита Колумбија, која се обрати на отворањето, повика на поголемо учество на студентите и младите истражувачи во вакви иницијативи. Според неа, науката и младите се клучни двигатели на просперитетот и одржливиот мир.
Во програмата беше вклучен и мастеркласот „Одржливата иднина се создава поинаку од денес“. Тој се одржа во Студентскиот информативен центар на УКЛО, под знакот на Алијансата КОЛОРС.
Студенти и академски кадри што создаваат универзитетски и студентски медиумски содржини во Алијансата КОЛОРС разговараа за улогата на младите и студентските медиуми во промовирањето на Целите за одржлив развој на ОН. На мастеркласот беа претставени и најновите изданија на Студентскиот магазин УКЛО КОЛОРС и списанието „Калеидоскоп“.







Коментари (0)
Коментарите за оваа објава се затворени.