Во средиштето на ученичкиот осврт беа ослободувањето од фашистичката окупација на 13 ноември 1944 година и неговото значење за Народноослободителната борба и стремежот за слободна македонска држава.
Операциите за ослободување започнале на 12 ноември, под раководство на Главниот штаб на Народноослободителната војска и партизанските одреди на Македонија, предводен од генералот Михајло Апостолски. Во уличните борби учествувале единиците на 42-та и 50-та дивизија, македонски ударни бригади и илегалните групи во градот.
Учениците потсетија и на спасувањето на Камениот мост и хидроцентралата „Матка“ од минирање, откако борците и диверзантите навреме ги пресекле каблите за детонација. Отпорот на окупаторот бил скршен попладнето на 13 ноември. Според податоците што ги пренесе училиштето, во борбите загинале над 420 борци и граѓани.
Историскиот осврт продолжи со културниот, образовниот и урбаниот развој на Скопје како главен град на слободна Македонија. На 13 Ноември се оддава почит на паднатите борци и традиционално се доделува наградата „13 Ноември“ на заслужни граѓани и институции.







Коментари (0)
Коментарите за оваа објава се затворени.