Дефилето почна на улицата „Маршал Тито“, кај „ДНКВ Комерц“, со учество на млади, родители и семејства, заедно со повозрасни љубители на велосипедизмот. Пораката беше да има повеќе велосипеди и помалку возила, со цел да се поттикнат здравите животни навики и користењето на велосипедот како достапен и еколошки начин на движење низ градот.
Манифестацијата се одржа шеста година по ред, по повод седмоноемвриските празници. Ја организираше Здружението на граѓани „ChangeMakers4All- Промени сѐ“, во коорганизација со „Точак клуб Гевгелија“, за рекреација, дружење меѓу генерациите и поттикнување на еколошката свест.
Во натпреварот во бавно возење, најмладите ги покажаа вештините за одржување рамнотежа, концентрација и дисциплина. Се натпреваруваа во две групи, а за сите учесници беа обезбедени дипломи како признание за учеството и вложениот труд.
Во првата група победи Филип Јованов, втор беше Давид Димовски, а трет Иван Митковски. Во втората група првото место го освои Ѓорѓи Шутов, пред Филип Стоилковиќ на второто и Леонид Ѓуров на третото место.
Главната награда за најуспешните натпреварувачи беа два нови велосипеда. Едниот го обезбеди градоначалникот на општина Гевгелија, Андон Сарамандов, кој и годинава ја поддржа манифестацијата.







Коментари (0)
Коментарите за оваа објава се затворени.