Реакцијата следува по барањата за прогласување кризна состојба во Крива Паланка. Според здружението, проблемот опфаќа стотици, можеби и над илјада грла добиток, а насоката во која се движи неговото решавање предизвикува загриженост.
„Анима Мунди“ се противи на рокот од 10 дена што, според здружението, градоначалникот го побарал за сам да го реши проблемот. Здружението оценува дека состојбата не може да се реши хумано во толку краток рок и дека досегашните активности не се насочени кон соодветна заштита и хумано згрижување на животните.
За случајот, наведува здружението, веќе известуваат европски и светски медиуми, со информации за институционален неуспех, материјални штети, загрозена безбедност и насилство врз животните. Неговата забелешка е дека и натаму недостигаат јасни и конкретни информации за тоа како животните ќе бидат заштитени.
Во однос на барањата за кризна состојба, „Анима Мунди“ порачува дека таа треба да служи за мобилизирање ресурси и координација на институциите, а не како дозвола за суспендирање на законите за заштита на животните. Проблемот, според здружението, се таложи со години и животните не смеат да ги платат со своите животи последиците од она што го оценува како долгогодишна институционална неспособност.
Од институциите и Општината бара координација, ресурси и конкретно, одржливо решение што ќе ги заштити граѓаните, но ќе обезбеди и живот, достоинство и хуман третман за животните. За заловувањето и згрижувањето бара транспарентност и одговорност.







Коментари (0)
Коментарите за оваа објава се затворени.