Во средиштето на приказната е Дора, жена која животот го посветила на семејството. Додека се грижи за повредена непозната жена, таа се соочува со долго потиснуваните чувства и почнува да ги преиспитува сопствените желби и избори.
Волкашин вели дека преку Дора сакал да истражи што се случува кога љубовта нѐ соочува со самите себе, со стравовите и со она што сме го потиснувале. Се надева дека публиката ќе ги разбере нејзините чувства и ќе ја препознае сложеноста на луѓето, како и правото секој да живее автентично и сам да избере кого ќе сака.
На премиерата присуствуваа Волкашин, продуцентката Елена Станишева и актерите Зорица Нушева, Лео Поповиќ и Јана Никодиновска. По проекцијата разговараа со публиката за создавањето на филмот, ликовите и темите за љубовта, личната слобода и општествените очекувања.
Според Агенцијата за филм, филмот бил одлично прифатен, а во реакциите биле издвоени актерските остварувања на Нушева и Поповиќ, авторскиот пристап на Волкашин и визуелната поетика. Интерес предизвикале и елементите на магичниот реализам и улогата на природата во создавањето на атмосферата.
За Станишева, најголемата вредност на филмот е способноста да комуницира со меѓународната публика, независно од културните и општествените разлики. Таа го опишува како приказна за забранета љубов која отвора пошироки прашања за изборите, стравовите, копнежите и желбите кога се во судир со правилата и очекувањата во кои сме воспитани. Токму во тој судир ја гледа неговата универзалност и вели дека ја радува што филмот предизвикува реакции и поттикнува дискусија.
Директорот на Агенцијата за филм, Сашко Мицевски, ја оцени премиерата како значаен чекор за Волкашин и екипата. Според него, поддршката на дебитантските остварувања е вложување во иднината на македонската кинематографија, а учеството во меѓународните натпреварувачки програми отвора простор за нови публики и професионални можности.
Филмот е продукција на „Веда Филм“, со продуцентката Елена Станишева, во копродукција со „Screening Emotions“ од Бугарија и „Studio Corvus“ од Хрватска. Реализиран е со поддршка на Агенцијата за филм на Република Македонија, Бугарскиот национален филмски центар, Хрватскиот аудиовизуелен центар и паневропскиот фонд „Eurimages“.







Коментари (0)
Коментарите за оваа објава се затворени.