Прегледот ги опфати барањата по јавните повици 01/2024, 02/2024 и 01/2025, како и динамиката на нивното одобрување, склучувањето договори и исплатата на финансиската поддршка. Агенцијата ги претстави и активностите за подобрување на искористеноста на средствата од ИПАРД.
Пред Комитетот беа изложени состојбата со акредитацијата на мерките, спроведените контроли и активностите преземени по извршените ревизии.
Состанокот беше дел од дводневната посета на претставници на Генералниот директорат за земјоделство и рурален развој при Европската комисија, посветена на унапредување на спроведувањето на програмата. Тие вчера се сретнаа со директорката на Агенцијата, Даниела Иротова Лазарева, и со вработените ангажирани во спроведувањето на ИПАРД.
Разговорите ги опфатија досегашниот напредок во работењето на Агенцијата, зајакнувањето на административните капацитети, внатрешните контроли, дигитализацијата на работните процеси и подобрувањето на условите за работа. Претставниците на Комисијата го обиколија и новиот објект на Агенцијата, чија реконструкција е во финална фаза.
За непосредно да им бидат претставени резултатите од користењето на европските средства и значењето на поддршката за македонското земјоделство, делегацијата посети и два реализирани проекти преку ИПАРД. Домаќини беа „Органик милк“ и „Розбери ЛК“, а посетата опфати и сточарска фарма.
Агенцијата оцени дека инвестициите во современи технологии, автоматизацијата на производствените процеси и модернизацијата на фармите се основа за поконкурентно, попродуктивно и одржливо сточарство. Според неа, посетените инвестиции предизвикале воодушевување кај претставниците на Европската комисија и се пример за другите земјоделски стопанства, како и поттик за поголема искористеност на европската поддршка.







Коментари (0)
Коментарите за оваа објава се затворени.