Битиќи наведува дека минималните месечни трошоци за храна и пијалаци за четиричлено семејство биле 22.317 денари во август 2024 година, а во август 2026 година достигнале 25.032 денари. Според него, основната исхрана за две години поскапела за 2.715 денари, односно за 12,2 отсто. Во домаќинство со една минимална плата, тоа поскапување апсорбира 78 отсто од номиналното зголемување на најниската заработувачка, наведува тој.
Во пресметката за храна и образование се вклучени 32.224 денари, а не се вклучени струја, вода, лекови, хигиена, превоз и домување. Битиќи оценува дека станува збор за основни потреби на човек што работи полно работно време.
Тој смета дека просечната плата не ја покажува целата слика и дека инфлацијата не ги погодува сите граѓани подеднакво. За некого, наведува Битиќи, поскапувањето значи помала месечна заштеда или одложено викенд-патување, а за друг поскапа храна, неплатена сметка, прескокната терапија или дете што нема да оди на училишна екскурзија.
Битиќи вели дека, ако Владата тврди оти земјата е меѓу најбрзорастечките економии во Европа, работниците имаат право да прашаат зошто тоа не го препознаваат во сопствените плати. Според него, економскиот успех треба да се мери и според тоа колкав дел од создадената вредност стигнува до луѓето што ја создаваат.
Според оценката на Битиќи, економија заснована на евтин труд не станува конкурентна, ги губи квалификуваните работници, ја намалува мотивацијата и ги поттикнува компаниите да опстојуваат со ниски плати наместо со иновации. Тој додава дека повисоката плата сама нема да ја запре емиграцијата и дека без достоинствено вреднуван труд ниту една стратегија за задржување на луѓето нема да биде веродостојна. Според него, трошокот за повисока плата може да се пресмета и да се плати од Буџетот, но цената на испразнета држава нема кој да ја плати.
Во објавата Битиќи упатува да се погледне неговиот говор на комисиската расправа за предлог-законот за изменување и дополнување на Законот за минимална плата.






Коментари (0)
Коментарите за оваа објава се затворени.