Денес се финализира првата фаза од дистрибуцијата на вакцините, за да продолжи вакцинацијата во подрачјата опфатени со почетниот дел од кампањата. Во првата фаза ќе се вакцинираат животни во Вардарскиот, Источниот, Југоисточниот и Североисточниот регион, каде што се евидентирани 1.859 стада со 193.527 животни.
Втората фаза ќе ги опфати Југозападниот, Пелагонискиот, Полошкиот и Скопскиот регион. Во овие четири региони се предвидени за вакцинација 1.558 стада со 244.515 животни.
Кампањата е наменета за клинички здрави овци и кози кои не се исклучени од вакцинација, како и за јагниња и јариња што ја достигнале минималната возраст за вакцинирање. Бремените и болните животни, како и другите категории, ќе се третираат во согласност со упатството за употреба на вакцината.
Третата фаза е дополнителна и има цел да обезбеди највисок можен опфат на животните. Во неа ќе влезат јагниња и јариња што ја достигнале минималната возраст по завршувањето на првите две фази, како и животни чија вакцинација била привремено одложена поради клиничката состојба или ветеринарна проценка. Ќе бидат опфатени и бремени животни и животни во првите шест недели по породувањето за кои вакцинацијата била одложена.
Дополнително ќе се вакцинира и на фарми што биле недостапни за време на почетната кампања. Фармите каде што вакцинацијата била одложена поради сомнение за инфекција со сипаници кај овци и кози ќе бидат опфатени под услов надлежниот официјален ветеринар да ја одобри вакцинацијата.
Вакцината е од турско потекло, а целата количина е обезбедена како донација од Европската унија. Кампањата се спроведува согласно Решението за итна вакцинација, со одобрение од ЕУ, а целта е да се спречи ширењето на болеста и да се намали ризикот од нејзино понатамошно појавување.







Коментари (0)
Коментарите за оваа објава се затворени.