Николоски рече дека подготовките за почеток на работите се во многу напредна фаза. Тој го опиша проектот како иден најголем поединечен инфраструктурен проект во Југоисточна Европа.
На Коридорот 8 е постигнат договор со Бугарија за железничко поврзување, а двете страни веќе работат на неговата реализација. Македонија инвестира околу 810 милиони евра во железничката врска, додека Бугарија презема слични активности на своја територија.
Патното поврзување со Бугарија е во понапредна фаза, а двете страни вложуваат значителни напори. Работите од македонска страна се завршени до границата, со изграден автопат или експресен пат. Македонија, заедно со Европската Унија, работи и на западната железничка врска со Албанија.
Вкупниот обем на инвестициите во овие коридори Николоски го процени на приближно пет до шест милијарди евра. Целта е Македонија да стане важна крстосница, која ќе придонесе за раст на бизнисот и економијата, како и за зајакнување на безбедноста.
На панелот „Заедничка визија за долгорочна економска соработка“, Николоски се заложи за заеднички пристап на земјите од регионот на глобалниот пазар. Зборувајќи за заеднички настап на европскиот пазар, справување со конкуренцијата и повисоко ниво на развој, тој оцени дека поединечните економии се премали за глобална конкурентност, а дека и регионот како целина е премал за самостоен конкурентен настап.
Според Николоски, политичките предизвици, политичкото минато и историското наследство ја отежнуваат соработката, но не ја намалуваат потребата од неа. Како клучно прашање за следниот период го посочи и тоа дали земјите од регионот ќе успеат да го подигнат квалитетот што го нудат.







Коментари (0)
Коментарите за оваа објава се затворени.