Расправата беше посветена на резултатите од анализата на состојбата во подготовката на Стратегијата. Сулејмани рече дека анализата е значајна основа за понатамошната работа и овозможува да се согледаат потенцијалите на државата, но и предизвиците и слабостите на туристичкиот сектор.
Според министерот, Стратегијата треба да даде јасна насока за современ, одржлив и долгорочен развој на туризмот и да одговори на состојбите и потребите на секторот. Тој наведе дека Владата и Министерството за култура и туризам го препознаваат туризмот како значаен за економскиот, културниот и локалниот развој, со потенцијал да придонесе и за севкупниот развој на земјата.
Покрај инфраструктурата, Сулејмани ги издвои создавањето поквалитетни и поконкурентни туристички производи, зголемувањето на должината на престојот и поврзувањето на културното наследство, природните ресурси и локалните производи со современите туристички трендови. Меѓу приоритетите ги посочи и рамномерниот регионален развој и создавањето услови за одржлив и конкурентен туризам на меѓународниот пазар. Тој повика на активно учество на сите чинители и рече дека е потребен заеднички одговор на овие прашања.
Во рамките на настанот, Министерството за култура и туризам додели признанија по повод Светскиот ден на туризмот за придонес во развојот и промоцијата на Македонија како туристичка дестинација. За најуспешна дојдовна туристичка агенција за 2026 година беа наградени ТА „Балкан прајм турс“ – Скопје, ТА „Камелија турс“ – Скопје и „Карачи турс“ (Ерак групација) – Скопје.
Признанија за најуспешен сместувачки капацитет за 2026 година добија „Холидеј ин“ – Скопје, „Лимак интернационал хотел“ – Скопје и „Мериот хотел“ – Скопје. Во категоријата најуспешна дигитална или социјална промотивна алатка за 2026 година беа наградени „kajak.mk“, „Quendoo.mk“ и инфлуенсерот „Finnmacedonia“.
Јавната расправа е дел од консултациите со засегнатите страни, со цел различните перспективи, искуства и потреби на туристичкиот сектор да бидат земени предвид во натамошната подготовка на Стратегијата.







Коментари (0)
Коментарите за оваа објава се затворени.