348 вести · 24 ч.
Берово 8°
Локални вестиДемокритика
Редакција: Македонија.мкИспрати тема

Мени на Македонија.мк

Редакција:Македонија.мкНационални и локални вести
Испрати тема

Над 10.800 ученици во стручните училишта учат по нови програми со зелени и дигитални вештини

Извор на фотографијата: Министерство за образование и наука
Извор на фотографијата: Министерство за образование и наука
  • Предвидено е поврзувањето на наставата со практична обука во компанија да продолжи и во високото образование.
  • За работниците, пак, се гради систем на доживотно учење со обуки, усовршување и преквалификација.
  • Промените ги опфаќаат и основните училишта.

Над 10.800 ученици во прва година средно стручно образование од оваа учебна година учат според модернизирани наставни програми, кои во сите струки вклучуваат СТЕМ-компетенции, зелени и дигитални вештини. Министерката за образование и наука Весна Јаневска ги претстави промените на регионалниот ФјучерЕкс Самит 2026.

За наставата по модернизираните програми обука поминале 569 наставници, а зајакната е и соработката со приватниот сектор. СТЕМ-компетенциите ги опфаќаат знаењата и вештините од природните науки, технологијата, инженерството и математиката.

Во средното стручно образование, особено преку дуалниот модел, теоретската настава се поврзува со реална работна средина. Партнерството на училиштата со работодавачите и локалните самоуправи овозможува програмите брзо да се усогласуваат со потребите на компаниите за обучен кадар, како и со барањата на зелената и дигиталната транзиција.

Јаневска оцени дека практичните вештини стекнати во стручното образование, кои можат да се применуваат во различни работни ситуации, им помагаат на учениците полесно да се приспособуваат на новите технологии. Предвидено е поврзувањето на наставата со практична обука во компанија да продолжи и во високото образование. Целта е студентите да можат да ги проверуваат, усовршуваат и продлабочуваат своите знаења и професионални вештини во реални работни услови.

За универзитетите и студентите се создаваат услови за активно учество во Европскиот простор за истражување и иновации. Тоа опфаќа зајакнување на научноистражувачката дејност, учество во европски програми и меѓународни академски партнерства, како и соработка меѓу универзитетите, научните институции и деловниот сектор.

За работниците, пак, се гради систем на доживотно учење со обуки, усовршување и преквалификација. Целта е работниците да стекнуваат нови знаења и вештини и да останат конкурентни на пазарот на труд додека се менуваат професиите и работните процеси.

Промените ги опфаќаат и основните училишта. Се воведуваат едносменска и целодневна настава за децата да добијат повеќе време за истражување и практични активности. Дополнителното време во училиште е наменето за истражувачки, проектни, практични, спортски и креативни активности, преку кои учениците ќе можат да експериментираат, да работат тимски, да решаваат проблеми и да ги применуваат своите идеи.

Јаневска нагласи дека сегашните основци во следните децении ќе носат професионални, економски, научни и општествени одлуки, па од најрана возраст треба да учат да поставуваат прашања, да поврзуваат информации и да препознаваат различни решенија. Покрај применливото знаење, според неа, образованието треба да развива креативност, иновативност и критичко размислување, но и емпатија, етички принципи и социјални вештини за живот и работа во услови на брзи технолошки промени и сложени глобални предизвици.

ФјучерЕкс Самитот 2026 го организира Институтот за комуникациски студии. Со него се заокружува образовната програма за писменост за иднината, развиена преку проектот ФјучерЛит, со поддршка од програмата „Erasmus“+.

Имате дополнителна информација или забелешка за текстот? Контактирајте ја редакцијата.

Коментари (0)

Коментарите за оваа објава се затворени.