Јаневска го поткрепи својот став со искуства од посетите на поголеми училишта што примиле ученици од помали средини. Во Карбинци, ученици од Долни Балван се префрлени во Таринци, каде што учат со повеќе деца. Според министерката, тие се многу задоволни од префрлањето, за што посведочиле и наставниците.
Едносменска настава е воведена во 620 од вкупно 1.023 објекти на основните и средните училишта. Со оптимизацијата на училишната мрежа ниту еден наставник не го изгубил работното место.
За идните вработувања, Јаневска најави дека ќе се одобруваат само таму каде што се неопходни. Како пример за таква потреба го посочи Скопје, додека за одредени други градови и населени места рече дека нема потреба од нов кадар. Таа ги критикуваше сите претходни влади, тврдејќи дека во минатото образованието служело за купување социјален мир.
За реорганизацијата на училишната мрежа е направена анализа на вишокот објекти, паралелки и наставници и е изработен план за оптимизација. Спроведувањето на оваа мерка и на едносменската настава има поддршка од УНИЦЕФ, а целта е поквалитетно образование.
Јаневска ги оцени мерките како позитивно искуство од развиените земји и рече дека извештајот на Европската Унија за напредокот на Македонија за 2026 година потврдува дека образовните промени се добри.
Министерката ги повика пратениците да го насочат вниманието кон квалитетот на образованието и да дебатираат за новите предлог-закони за високото образование и науката, кои сѐ уште не се донесени.







Коментари (0)
Коментарите за оваа објава се затворени.