Најважно
347 вести · 24 ч.
Берово 8°
Најважно
Локални вестиДемокритика
Редакција: Македонија.мкИспрати тема

Мени на Македонија.мк

Редакција:Македонија.мкНационални и локални вести
Испрати тема

Македонија обезбеди 7,63 милиони евра грантови за партнерства меѓу образованието и компаниите

Фотографија од настанот · Стопанска комора на Македонија
Фотографија од настанот · Стопанска комора на Македонија
  • Поддршката во Македонија опфаќа 12 стручни училишта, пет факултети и 88 компании и организации.
  • Фондот финансира опрема и инфраструктура за дуално и стручно образование.
  • Во шесте економии се одобрени инвестиции од 60,5 милиони евра.

Македонија преку четирите јавни повици на Регионалниот фонд за предизвици обезбеди вкупно 7,63 милиони евра грантови за 17 конзорциуми што ги поврзуваат образовните установи и стопанството. Поддршката опфаќа 12 стручни училишта, пет факултети и 88 компании и организации.

Фондот финансира опрема и инфраструктура за проекти за дуално и стручно образование, подготвени заеднички од установите за стручно образование и компаниите. Целта е развој на вештини што се бараат на пазарот на трудот и зголемување на продуктивноста, конкурентноста и иновативноста на компаниите во шесте економии на Западен Балкан.

На регионално ниво, преку четирите повици се одобрени инвестиции од вкупно 60,5 милиони евра. Поддржани се 705 партнерски компании и финансирани се 137 проекти, во кои се реализираат 240 програми за стручно образование и обука за околу 8.000 ученици.

Недостигот на квалификуван кадар беше во средиштето на петтата годишна конференција на Фондот, одржана вчера во Сараево на тема „Од недостиг на вештини до систем за развој и обезбедување таленти“. На конференцијата беше истакнато дека стопанството има слободни работни места, но пазарот на труд не нуди квалификувана работна сила за нивно пополнување, поради што партнерството со образованието е клучно за развој на потребните вештини и компетенции.

Претставници на компании и образовни институции од шесте земји на Западен Балкан, експерти и претставници на меѓународни институции разговараа на три панели за развој на таленти, надминување на јазот во вештините преку соработка меѓу стопанството и образованието и за вештините што ќе им бидат потребни на компаниите во иднина. Тие разменуваа искуства и добри практики за создавање кадар според потребите на стопанството.

Посебно внимание беше посветено на соработката меѓу компаниите и стручните училишта, развојот на зелените и дигиталните вештини, еднаквите можности и обезбедувањето праведна транзиција.

Регионалниот фонд за предизвици е основан на иницијатива на германското Министерство за економска соработка и развој, а се финансира преку Германската банка за развој. Главен партнер за негово спроведување е Коморскиот инвестициски форум на Западен Балкан, чија членка е и Стопанската комора на Северна Македонија.

Германското министерство обезбеди 95,4 милиони евра за Фондот. Швајцарската влада, која се приклучи во 2023 година, преку Швајцарската агенција за развој и соработка обезбеди дополнителни 10 милиони швајцарски франци.

Имате дополнителна информација или забелешка за текстот? Контактирајте ја редакцијата.

Коментари (0)

Коментарите за оваа објава се затворени.