„Вљубениот Шекспир“ е дипломска претстава на режисерката Бојана Василковска.
Филип Христовски го игра Вил Шекспир, а Катерина Јовановиќ ја толкува младата благородничка Виола де Лесепс. Во приказната, нивната средба и љубов му ја враќаат инспирацијата на драматургот. Низ тој однос претставата го следи претворањето на личното искуство во уметност: љубовта, болката, копнежот, страдањето и загубата стануваат дел од драмскиот јазик и од потребата да се создаде нешто што ќе го надживее својот автор.
Театарот во оваа драма не е само место на дејството, туку ги поврзува ликовите, нивните судбини и емоции. Со поместувањето на границата меѓу реалноста и сценската илузија, приказната ја развива темата за целосното препуштање и во љубовта и во создавањето уметност.
Василковска ја гледа актуелноста на приказната во контрастот со современото живеење. Според неа, наспроти навиката луѓето да ги контролираат чувствата, да се штитат од разочарување и внимателно да ги одмеруваат односите, ликовите во „Вљубениот Шекспир“ се осмелуваат да љубат и кога тоа носи можност за страдање.
„Нивната храброст да бидат ранливи за мене претставува потсетник на нешто што постепено го губиме. Во свет кој нѐ учи на дистанца, театарот сѐ уште има моќ да нѐ доближи до сопствените емоции, да нѐ разоружа и да нѐ потсети дека ранливоста не е слабост, туку предуслов за вистинско човечко искуство“, вели Василковска. За режисерката, врската меѓу љубовта и театарот ја носи и пораката дека човекот создава најискрено кога најдлабоко чувствува, а интимните доживувања можат да станат почеток на уметничко дело.
Во актерската екипа, Исидор Јовановски ги игра Кит Марлоу, Ралф и Чамџијата, Благојчо Стојанов ги толкува Хенслоу и Сер Роберт де Лесепс, а Жарко Спасовски настапува како Весекс и Нол. Зорица Панчиќ ги игра кралицата Елизабета и Дадилката, Фаик Мефаилоски е Фенимен и Вабаш, Кире Ацевски ги толкува Барбиџ, Чуварот и Сем, а Мартин Мазнев ги игра Ламберт, Тилни и Нед Алејн.
Преводот е на Сашо Димоски и Катерина Момева, сценографијата на Филип Коруновски, а костимографијата на Катерина Чукниева. Кореографијата ја подготви Васил Зафирчев, изборот на музиката е на Сашко Костов, а шминката на Мартина Чукниева.
Во сценскиот и техничкиот тим, инспициент е Славиша Ѓеоргиев, суфлер е Орхидеја Дукова, а технички раководител Никола Игнов. За светлото се задолжени Марјан Тодоровски и Зоран Јордев, за тонот Сашко Костов, гардеробер е Јулија Ангеловска, а реквизитер Благој Илиев.
Декорот го изработија Игор Гаврилов, Хишам Латифов, Ѓоре Павлов, Јовица Стаменковски, Трајче Кулев, Роберто Карадаковски, Никола Спасев, Александар Костов, Игор Стоиљковиќ и Леонид Николов.








Коментари (0)
Коментарите за оваа објава се затворени.