Средбата во „G4G“ центарот беше трета работилница на проектот „Зелено за добро“ („G4G“), во организација на проектниот партнер „CISS“. Нејзината цел беше да ги поврзе европските климатски политики со решенија применливи на локално ниво во прекуграничниот регион.
Проф. д-р Страхиња Трпевски ги претстави европските стратегии и цели до 2030 година, со осврт на пет меѓусебно поврзани области: обновлива енергија, управување со води, шумарство, земјоделство и туризам.
Преку практични примери, учесниците разгледаа можности за подобрување на енергетската ефикасност на јавните објекти, користење соларна енергија и дигитални алатки за енергетско планирање. Беа опфатени и одржливото управување со водните ресурси, заштитата на шумите од пожари, климатски отпорното земјоделство и приспособувањето на туристичките дестинации кон климатските промени.
Во интерактивниот дел, учесниците заеднички утврдуваа приоритети и предлагаа можни решенија. Покрај идеите за водите и пожарите, се разгледуваа поефикасно користење на ресурсите во земјоделството, циркуларна економија и одржлив и пристапен туризам.
Дискусијата ги опфати и пречките за реализација: финансиските средства, застарената инфраструктура, административните процедури и потребата од подобра координација меѓу институциите.
Практичниот дел вклучи две теренски посети со примери од управувањето со води и обновливата енергија. Според Центарот за развој на Југоисточниот плански регион, работилницата ја нагласи потребата од соработка меѓу општините, јавните институции и другите локални чинители за развој на практични и климатски отпорни решенија.
Проектот „Зелено за добро“ се спроведува преку Интеррег „VI-A“ ИПА Програмата Грција – Северна Македонија 2021–2027, со кофинансирање од Европската Унија и националните фондови на земјите учеснички.







Коментари (0)
Коментарите за оваа објава се затворени.