На средбата присуствувал и полицискиот аташе Михаел Жано. Според МВР, соработката меѓу двете земји во областа на внатрешните работи трае повеќе од две децении, а соговорниците истакнале дека сакаат да продолжи преку конкретни активности, обуки и размена на искуства.
За обуката на аеродромот информирал амбасадорот Ле Риголер. Ја реализираат француски експерти од Жандармеријата за воздушен транспорт на Франција. Таа е насочена кон размена на експертиза и практични знаења за сигурноста и безбедноста на аеродромите, како и кон унапредување на професионалните капацитети на полициските службеници и лицата задолжени за обезбедување.
Тошковски истакнал дека соработката со Франција се преточува во конкретни активности и обуки, а размената на знаење и искуство со француските експерти, според него, директно придонесува за унапредување на професионалните и оперативните капацитети на македонската полиција.
До крајот на годината се најавени обуки за спречување перење пари и за разузнавачки активности и работа во казнено-поправните домови. Соговорниците разговарале и за можноста да ја прошират соработката со Центарот за обука на МВР, со обуки креирани според потребите на идните полициски службеници.
Двете страни изразиле задоволство од досегашната соработка и подготвеност таа дополнително да се продлабочува во области од заемен интерес.







Коментари (0)
Коментарите за оваа објава се затворени.