Конференцијата во Будва и министерскиот состанок во Цетиње се одржале во рамките на Берлинскиот процес. На двата настана се разговарало за зајакнување на Заедничкиот регионален пазар и за забрзување на економското приближување на Западен Балкан кон Европската Унија.
Дурмиши оценил дека регионот има индустриски капацитети, квалификувана работна сила и компании поврзани со европски производители, но дека соработката меѓу економиите сè уште е под потенцијалот. Според него, домашните компании треба да се поврзат во регионални синџири на снабдување и да развиваат производи и услуги со поголема додадена вредност.
Министерот посочил дека целта не е Северна Македонија да биде само локација за производство. Домашните компании, според неговата порака, треба да станат посилни добавувачи, да развиваат сопствени производи и технологии и да имаат поголемо учество во европските синџири на вредност. За тоа, рекол, се потребни подобро поврзан регионален пазар, квалификувани луѓе и повеќе инвестиции во иновации.
На министерскиот состанок Дурмиши нагласил дека спроведувањето на договорените мерки во рамките на Заедничкиот регионален пазар треба да стане приоритет. Меѓу нив ги навел заемното признавање документи и квалификации, прифаќањето електронски потписи и поврзувањето на дигиталните системи. Според него, овие мерки ќе им заштедат време и трошоци на компаниите што работат на повеќе пазари во регионот.
Дурмиши посочил дека веќе постојат стратегии, договори и акциски планови, но дека треба да се покажат резултати што ќе ги почувствуваат компаниите и граѓаните. Според него, кога постапките ќе може да се завршуваат дигитално и документ издаден во една економија ќе се признава во друга, регионалната интеграција ќе стане реална придобивка за бизнисот.
Тој порача дека посилен регионален пазар ќе им овозможи на компаниите полесно да растат и да привлекуваат инвестиции, а на економиите побрзо да се приближуваат кон единствениот европски пазар.







Коментари (0)
Коментарите за оваа објава се затворени.