Според обвинителството, осомничениот дал поткуп на службено лице во Министерството за економија за тоа да му обезбеди лиценца за угостителска дејност. Поткупот, како што наведува обвинителството, бил за службеното лице да изврши службено дејствие што не смеело да го изврши. Барање за лиценца не било поднесено, а осомничениот знаел дека неговиот објект не ги исполнува законските услови.
Обвинителството донело наредба за истражна постапка за кривичното дело давање поткуп од член 358 став 1 од Кривичниот законик. За тоа дело е предвидена казна затвор од една до 10 години.
Јавниот обвинител доставил до Основниот кривичен суд Скопје предлог за притвор, повикувајќи се на опасност од бегство и на тоа дека против осомничениот се води уште една кривична постапка за тешки дела против општата сигурност.
Осомничениот досега бил обезбеден како обвинет во другата постапка. Бидејќи во тој предмет истекуваат законските рокови за обезбедување, а обвинителот продолжува да прибира докази за дејствијата поврзани со поткупот, проценил дека ризиците се големи и побарал притвор.
Обвинителството оценува дека притворот е неопходен за да се обезбеди присуството на осомничениот. Службеното лице за кое обвинителството наведува дека го примило поткупот веќе е обвинето, а против него се води судска постапка за дејствија на примање поткуп.







Коментари (0)
Коментарите за оваа објава се затворени.