„ElevenAI“ беше претставена на настанот 11/11 „Summit“ во Њујорк. „ElevenLabs“, чија проценета вредност е 22 милијарди долари, ја позиционира како производ за заедничка работа во тим, а не првенствено како лична алатка за продуктивност.
Апликацијата може да води белешки од состаноците и да ги извести другите учесници дека разговорот се снима. Корисниците можат да поставуваат прашања за податоци од повеќе состаноци и да добиваат помош во живо за време на разговор, вклучително и за потсетување на важен детаљ од претходни разговори.
Компаниите можат да го интегрираат „ElevenAgent“ за задачи што следуваат по состанокот. Еден од наведените примери е подготовка на нацрт на електронска порака врз основа на белешките.
Функцијата за диктирање го претвора говорот во уреден текст во која било апликација. Според „ElevenLabs“, покрај поддршката за повеќе од 90 јазици, системот може да разбира и терминологија специфична за одделни индустрии, и при диктирање и при транскрипција на состаноци.
Со „ElevenAI“ компанијата влегува во област во која „Fireflies“, „Wispr Flow“ и „Granola“ во последните месеци веќе воведоа конкурентски функции за диктирање и бележење состаноци. Во анализата на „TechCrunch“, новата апликација е и начин „ElevenLabs“ да го прикаже сопствениот модел и да ги искористи своите агентски платформи за пренесување на контекстот од разговорите. Медиумот оценува дека целта можеби не е директен натпревар на пазарот на алатки за продуктивност, туку понуда за деловни тимови што би го користеле ова решение наместо да купуваат посебни лиценци за бележење состаноци. Тоа се вклопува во поширокиот стремеж на ваквите алатки да станат централни бази на знаење за компаниите и да го автоматизираат извлекувањето информации и последователните задачи.
Во изминатата недела „ElevenLabs“ ја претстави и серијата „Scribe v3“ за претворање говор во текст, со транскрипција во живо и можност компаниите дополнително да ги приспособуваат моделите со сопствени податоци. Меѓу новитетите се и алатка за избор на соодветен јазичен модел според намената, како и алатка за создавање рутини што автоматизираат задачи врз основа на транскриптот.







Коментари (0)
Коментарите за оваа објава се затворени.