Според Исени, АС Сењак влегла во банкарскиот бизнис во октомври 2024 година, кога купила значителен пакет акции во Стопанска банка Битола. Тој тврди дека на 9 јуни 2025 година компанија поврзана со сватот на Ахмети добила кредит од пет милиони евра директно од централата на Алта банка во Белград.
Три месеци подоцна, на 17 септември 2025 година, АС Сењак, според ВЛЕН, ги продала своите акции на Мацура и на Алта банка, овозможувајќи му да ја преземе контролата врз битолската банка, подоцна преименувана во Алта банка Македонија. Исени тврди дека сватот на Ахмети преку фирмата со продажбата наплатил милиони и дека Мацура во моментов се наоѓа во притвор во Србија.
Исени праша дали Мацура фактички го финансирал сопствениот влез на македонскиот пазар со свои пари, преку кредитот даден на компании поврзани со семејната деловна мрежа на Ахмети. Побара одговор и дали продажбата на акциите била однапред договорен надомест за затворање на јунскиот кредит.
ВЛЕН бара да се утврди и колкави биле нето-добивката, разликата во цената и провизијата што, според партиското сомневање, останале на сметките на семејниот деловен круг на Ахмети и неговите внуци за посредувањето во корист на Мацура. Исени ги претстави тврдењата како продолжение на претходните обвинувања за кредитот, за кои, како што рече, од Зајас продолжува молкот.
Тој ги обвини поранешните функционери на ДУИ, Фатмир Бесими, Бујар Османи и Артан Груби, дека агресивно го туркале влезот на Алта банка во финансискиот сектор на Македонија. Според неговото тврдење, додека тие политички ѝ го отворале патот низ државните институции, сватот на Ахмети ги чувал, а потоа му ги препродал акциите на Мацура.
Од Јавното обвинителство и Управата за финансиско разузнавање ВЛЕН побара истрагата заедно да ги опфати кредитот од 9 јуни и продажбата од 17 септември 2025 година. Исени порача дека банкарскиот систем не смее да стане плен на регионални олигарси во притвор и на семејниот деловен круг на Ахмети, кој го окарактеризира како картел, и побара целосна финансиска и кривична одговорност за трансакциите.






Коментари (0)
Коментарите за оваа објава се затворени.