Состанокот, во рамките на Спогодбата за стабилизација и асоцијација, го копретседаваа државниот секретар во Министерството за економија и труд Јумни Адеми и Фредерик Свинен, претставник на Генералниот директорат за проширување и источно соседство на Европската комисија.
Европската комисија го поздрави усвојувањето на Законот за спроведување на Директивата за Вториот столб. Таа ја нагласи потребата од развој на даночните ИТ-системи и автоматска размена на финансиски информации според стандардите на ОЕЦД. Во царинската област беше констатиран напредок во примената на системот „SEED“+, ревидираните ПЕМ-правила и олеснувањето на царинските постапки. Комисијата препорача брзо усвојување на новиот Царински законик.
За индустријата и туризмот беа разгледани подготовката на Индустриската стратегија за 2027 година, Националната стратегија за туризам за 2027–2032 година и поедноставувањето на деловното работење, со акцент на дигиталната и зелената трансформација и регионалната соработка.
За слободното движење на стоки, Комисијата ја нагласи потребата од усогласување со европското законодавство, зајакнување на административните капацитети и склучување Договор за оцена на сообразност. Адеми ја истакна посветеноста на Владата на реформите и усогласувањето на националното законодавство со правото на ЕУ, како и важноста на континуираниот дијалог со Комисијата.







Коментари (0)
Коментарите за оваа објава се затворени.