Протестот го организираше Форумот на жени на СДСМ, а покрај партиски членови присуствуваа и граѓани кои нагласија дека дошле да побараат правда, без партиска припадност. Меѓу присутните беа бабата на Сара и нејзина блиска сосетка, кои порачаа дека ги интересира правдата за нападнатата девојка, а не политичките партии.
Од собирот беа упатени и барања за заштита на другите жени изложени на насилство. Претседателката на Форумот, Каја Шукова, побара полицијата и останатите надлежни служби да реагираат веднаш на секоја пријава за семејно насилство, наместо жртвите да остануваат без заштита.
Шукова побара превенција на насилството и фемицидите, утврдување одговорност и истраги и судења без политички влијанија. Повикот го упати до Министерството за внатрешни работи, локалната полиција, обвинителството и центрите за социјална работа. Според неа, системските недостатоци не се видливи само пред нападите, туку и во постапките што следуваат по нив.
Собирот се одржа во време кога дел од граѓанските иницијативи се оградија од партиското вмешување во случајот. Иницијативата „Ниту една повеќе“ претходно го откажа својот најавен протест и се спротивстави на политичкото инструментализирање на незадоволството. Протестот пред СВР Охрид, организиран од Форумот на жени на СДСМ, сепак се одржа.







Коментари (0)
Коментарите за оваа објава се затворени.