Нејзината забелешка се однесува и на изборот на судии од редот на истакнатите правници што ги избира Собранието и на кандидатите од редовното судство што ги предлага Судскиот совет. Павловска-Данева го посочи недоволно транспарентниот избор како еден од предизвиците за довербата во уставното судство.
Таа потсети и на честите периоди во кои Уставниот суд работел во неполн состав. Во одреден период, како што нагласи, Судот бил оставен да работи на работ на кворумот, со само пет од предвидените девет судии.
Павловска-Данева зборуваше на втората тематска сесија на меѓународната конференција во Охрид, посветена на јакнењето на довербата во уставните судови. Таа нагласи дека дел од начините за градење доверба зависат од самите уставни судии, но значаен дел зависи и од однесувањето на политичките елити, државните органи, медиумите и граѓанските организации.
Во тој контекст, таа ги критикуваше и владејачките и опозициските партии за свесно и намерно вовлекување на Уставниот суд во решавањето политички, па и меѓупартиски проблеми. Тоа го опиша како инструментализација на јавниот дискурс.
Објаснувајќи ја положбата на институцијата, Павловска-Данева оцени дека Уставниот суд е и судски и политички орган. Таа се повика на определбата на Ханс Келзен за Судот како „негативен законодавец“: кога укинува закон, иако постапува во судска постапка и форма, според нејзиното објаснување врши функција што во суштина е законодавна, односно политичка.
Дополнително, Судот одлучува за општи правни акти што се директен израз на политичката волја на законодавната и извршната власт. Изборот на уставните судии од парламентот, со временски ограничен мандат, според Павловска-Данева е најдлабоката разлика во однос на редовните судови. Затоа, смета таа, и начините на стекнување доверба мора да се разликуваат од оние на другите државни органи.
Како предизвик во работата на самиот Суд таа го издвои сложениот правно-технички јазик во одлуките, особено во нивните образложенија. Покрај транспарентниот избор на судиите, Павловска-Данева ги посочи отвореноста и јавноста во работењето и поедноставувањето на јазикот како услови за градење легитимитет преку довербата на граѓаните.







Коментари (0)
Коментарите за оваа објава се затворени.