Јаневска рече дека реформите се насочени кон отстранување на системските слабости и подобрување на квалитетот на образованието, од основното до високото. Како причина за итноста ја наведе потребата да не се губи човечки потенцијал.
Како мерки таа ги посочи вложените 70 милиони евра во образовната инфраструктура за две години и набавката на нови наставни програми и учебници. За мотивацијата на наставниот кадар, рече дека се работи преку раст на платите и повеќе можности за кариерен и професионален развој.
Во основното образование се реализира програма за професионална ориентација, а во средното се номинираат кариерни советници. Дигиталните вештини и вештачката интелигенција се дел од повеќе наставни програми, додека се работи на интегрирање вештини за зелена транзиција.
Јаневска го оцени дуалното образование во средните стручни училишта како најуспешен образовен модел. Според неа, речиси целосно е обезбедено вработување за кадрите кај работодавачите каде што се реализирале практичното образование и обуката.
Таа рече дека дел од факултетите веќе се поврзуваат со компании и испраќаат студенти на практична обука. Оцени дека пренесувањето на дуалниот модел и во високото образование би имало ефект.
Предлог-законот за високото образование предвидува стручни студии од прв циклус, специјалистички стручни студии од втор циклус и кратки стручни студии. Тој сè уште е во собраниска процедура, а Јаневска очекува да биде усвоен и смета дека примената ќе ја зајакне врската меѓу образованието и пазарот на трудот.







Коментари (0)
Коментарите за оваа објава се затворени.