Во Македонија во 2025 година на патиштата загинале 132 лица, наспроти 142 во 2024 година. Во првите десет месеци од 2026 година се бележи и тренд на намалување на бројот на загинати од околу 25 проценти.
Претседателот на РСБСП, Горан Ангеловски, порача дека зад статистиката стојат човечки судбини и семејства кои трајно живеат со последиците од сообраќајните незгоди. Тој повика сеќавањето да биде и поттик за заедничка акција, нагласувајќи дека едукацијата, превенцијата, одговорното однесување и институционалната соработка се неопходни за побезбедни патишта и спасување животи.
РСБСП апелираше за култура на одговорност и почит во сообраќајот, со заедничка обврска на институциите, возачите, пешаците, велосипедистите и другите учесници. На присутните граѓани им беа поделени превентивно-едукативни материјали со пораки за одговорно однесување и почитување на животот како највисока вредност.
На настанот беше упатен и потсетник дека од 15 ноември започнува законската обврска за задолжително поседување зимска опрема во возилата. Возачите беа повикани да ги приспособат брзината и начинот на управување со возилото на временските услови и состојбата на патиштата.
Во реализацијата на настанот учествуваа и учениците од сообраќајната секција на АСУЦ „Боро Петрушевски“ од Скопје. Почит на жртвите оддадоа граѓани и претставници на институциите, академската заедница и граѓанскиот сектор.
Одбележувањето го организираше Републичкиот совет за безбедност на сообраќајот на патиштата, во соработка со Министерството за внатрешни работи, ОСБСП и другите партнери.







Коментари (0)
Коментарите за оваа објава се затворени.