Претседателот на Советот на Скопскиот плански регион и градоначалник на Сопиште, Јане Мицевски, кој ја отвори расправата, го оцени просторниот план како еден од најзначајните стратешки документи за идниот развој на државата. Тој ја нагласи неговата улога во долгорочното и одржливо користење на просторот и во рамномерниот регионален развој.
Мицевски го посочи Скопскиот плански регион како основен двигател на тој развој, опишувајќи го како најурбан административен центар во државата. Според него, регионот се соочува со бројни предизвици, но има и значајни можности преку просторното планирање, сообраќајната поврзаност, инфраструктурата и управувањето со природните ресурси да придонесе за заштита на животната средина и подобар квалитет на живот на граѓаните.
Клучните аспекти на нацртот ги презентираше д-р Душица Трпчевска-Ангелковиќ, раководителка на Секторот за просторно планирање во Агенцијата за планирање на просторот. По презентацијата, учесниците поставуваа прашања и изнесуваа мислења, искуства и забелешки. Според Центарот за развој на Скопскиот плански регион, на расправата присуствуваа претставници на институциите, општините, академскиот, стручниот и граѓанскиот сектор.
Расправата ја организираше Центарот во соработка со Министерството за животна средина и просторно планирање и Агенцијата за планирање на просторот. Воведни обраќања имаа и Дејан Гаџовски, раководител на Одделението за планови и просторна политика, и Неби Реџепи, раководител на Секторот за просторно планирање во Министерството.







Коментари (0)
Коментарите за оваа објава се затворени.