Според објавата на партијата, номиналната цена на струјата во евра е приближно на нивото во Србија и Албанија. Левица наведува дека ЕУРОСТАТ ја споредува цената со куповната моќ на населението, при што Македонија, според тие податоци, има највисок трошок меѓу земјите од Западен Балкан.
Партијата објаснува дека ЕУРОСТАТ го користи „PPS“, односно стандардот на куповна моќ, за споредување на реалниот ценовен товар меѓу државите, земајќи ги предвид разликите во ценовното ниво и куповната моќ.
Левица оценува дека ниските приходи и растечките трошоци за живот го засилуваат влијанието на поскапувањето на основните енергетски потреби врз животниот стандард. Партијата тврди и дека честите промени на правилниците и тарифните модели на РКЕ имаат цел да ѝ удоволат на политичко-енергетската олигархија, додека товарот од нефункционалниот енергетски систем се префрла врз граѓаните.
Левица бара тарифните блокови да останат, но да се прошири периодот на евтина тарифа за да биде достапна за повеќе домаќинства. Предлага зимски и летен повеќетарифен систем со повеќе часовни блокови и сончева тарифа, за усогласување на производството со побарувачката, искористување на сончевите вишоци и намалување на сметките.
Како единствена можност за структурно намалување на цената, Левица ја наведува законската определба на ЕЛЕМ Продажба за универзален снабдувач, со двојно помала маржа од сегашната маржа на ЕВН Хоум, наведена како 9,9%. Партијата бара електроенергетскиот систем да биде во функција на јавниот интерес.







Коментари (0)
Коментарите за оваа објава се затворени.