Настанот е планиран за 16 октомври 2026 година, а предвидената локација е улицата „Живко Чинго“, позната како „Боемска улица 2“. Програмата треба да опфати изложба на оригинални македонски народни носии и традиционални везови, придружена со стручно или едукативно објаснување за нивното потекло и историски контекст. Предвидени се и дефиле на културно-уметнички друштва од Центар, едукативен дел за историјата, микротоновите и спецификите на македонскиот фолклорен мелос и концертна ретроспектива на фестивалски народни песни. Општината ќе обезбеди озвучување и осветлување.
Право на учество имаат регистрирани здруженија, организации и правни субјекти од областа на културата со седиште во Општина Центар-Скопје. Тие треба да имаат активна трансакциска сметка, активен статус најмалку една година, најмалку една година работно искуство во културата, како и статут и решение за регистрација.
Апликантите треба да понудат целосна логистичка, уметничка и организациска подготовка на програмата. Износот што ќе биде доделен за избраниот проект ќе зависи од неговата големина и квалитет, во рамките на предвидените средства во општинската програма и буџет.
За пријавување се бараат пополнет образец со краток опис и агенда, портфолио, биографии на вклучените лица и изведувачи, референтна листа, финансиска конструкција и податоци за активната трансакциска сметка. Потребно е и решение за регистрација или тековна состојба од Централниот регистар не постара од шест месеци. Образецот за пријавување ќе биде достапен на https://www.centar.gov.mk/.
Пријавата се пополнува електронски, но се доставува во еден оригинален примерок, потпишан и заверен со печат од одговорното лице. Документите може да се испратат по пошта до Секторот за јавни дејности, Одделение за култура, на улица „Михаил Цоков“ број 1, 1000 Скопје, или да се поднесат во општинската архива, барака 6, од 9 часот до 15 часот. На пратката треба да биде означен јавниот повик за „7/8 Центарски Такт“. Материјалите доставени со пријавите нема да бидат вратени.
Комисија од општинската администрација ќе ги оценува оригиналноста на идејата, референците и портфолиото, како и прифатливоста на финансиската конструкција. По рангирањето, учесниците ќе бидат известени за резултатите, а со избраниот субјект ќе биде склучен договор за финансирање. Нецелосните пријави, оние на несоодветен образец и пријавите доставени по рокот нема да се разгледуваат.







Коментари (0)
Коментарите за оваа објава се затворени.