Според ДОМ, американската „DFC“ во април склучила договор за до 5 милиони долари развојно финансирање за компанијата „Pela Global“. Партијата нагласува дека средствата се наменети за студии за изводливост и истражувања со кои допрва треба да се потврди одржливоста на проектот. Според неа, потенцијалниот стратешки интерес на глобалните синџири на снабдување не е доказ за исплатливост и не смее да биде изговор за намалување на еколошките критериуми.
ДОМ бара одговор колкави се докажаните рудни резерви и со кои геолошки испитувања се утврдени, како и какви капацитети и технологии се планираат за експлоатација и преработка. Партијата прашува и колку вода ќе се троши, од кои извори, како ќе се спречи загадувањето, каде ќе се складира јаловиштето и кој ќе ја гарантира неговата долгорочна безбедност.
Меѓу барањата се и информации кој ќе ги покрие трошоците за рекултивација и какви финансиски гаранции ќе обезбеди инвеститорот. ДОМ бара Владата да одговори дали се направени независни студии за влијанието врз здравјето и животната средина и кога тие ќе бидат достапни за јавноста.







Коментари (0)
Коментарите за оваа објава се затворени.