Ивона Стерјевска од Правниот факултет и Наталија Василевска од Техничкиот факултет зборуваа за личните искуства од учеството во овие активности. Нивните искуства беа дел од разговорот за досегашните резултати од членството во Алијансата и за студентската и академската мобилност.
Практичното користење на можностите што ги нуди КОЛОРС беше тема и на раководителката на УКЛО КОЛОРС, проф. д-р Јасмина Буневска-Талевска. Таа зборуваше за вклучувањето на студентите и професорите, размената на знаења и придобивките за наставата и надвор од неа.
Ректорот, проф. д-р Игор Неделковски, ги разгледа можностите за образование според европски стандарди, но и предизвиците поврзани со заедничките дипломи. Тој зборуваше за усогласување на процесите за полесно функционирање на европските универзитетски партнерства, со цел младите да останат во земјата.
Пошироката корист од соработката ја нагласи почесната конзулка на Република Франција, Калиопа Кривашија-Стилиновиќ, која се наврати на почетоците на меѓународното академско поврзување на УКЛО со КОЛОРС. Според неа, европските инструменти и механизми можат да ја унапредат соработката и да ги направат придобивките од академското поврзување подостапни за градот, регионот и државата.
Панелот „УКЛО КОЛОРС – кога академската соработка станува јавен интерес“ го организираше интернет-порталот „Сакам да кажам“, во соработка со УКЛО, а го модерираше новинарката Жанета Здравковска. Настанот беше дел од проектот „Поддршка за европската интеграција на Северна Македонија“, кој го спроведува Канцеларијата на Обединетите нации за проектни услуги (УНОПС).
Дискусијата заврши со порака дека идниот успех на УКЛО КОЛОРС треба да се мери не само со бројот на меѓународни партнерства и академски размени, туку првенствено со промените во квалитетот на образованието, развојот на Универзитетот и неговото поврзување со опкружувањето.







Коментари (0)
Коментарите за оваа објава се затворени.