Состанокот, организиран од Коморскиот инвестициски форум на коморите на Западен Балкан (КИФ ЗБ), бил посветен на напредокот на економиите во регионот три години по лансирањето на Планот за раст и две години по усвојувањето на Акцискиот план за Заедничкиот регионален пазар 2.0. Учествувале претставници на компаниите членки на Бизнис советот на КИФ ЗБ, стопанските комори од регионот, Европската комисија, Секретаријатот на ЦЕФТА и Регионалниот совет за соработка. Состанокот се одржал на маргините на Економската конференција „Монтенегро 2026“, под слоганот „Поврзани економии за посилна Европа“, и во пресрет на овогодишниот Самит на Берлинскиот процес.
Дискусијата опфатила поефикасно спроведување на реформите, забрзување на протокот на стоки со ЕУ, транспортна инфраструктура и можностите за користење европски фондови. Се разговарало и за условите за работење и конкурентноста на компаниите во процесот на приближување кон единствениот европски пазар. На состанокот биле презентирани наодите и препораките од Извештајот за имплементација на регионалниот заеднички пазар, како и анализа на трговските можности и регионалните вредносни синџири.
Разговорите се фокусирале и на влијанието на регионалните реформи врз секојдневното работење на компаниите, пречките за интрарегионалната трговија и влијанието на европските регулативи врз деловното опкружување. Од перспектива на стопанствениците, клучно е дали компанијата може да ја достави стоката до купувачот навреме, под познати услови и без непредвидени трошоци. Како пречки биле наведени неконзистентното работно време на надлежните служби, нејасните барања за документација и непредвидливоста на трговските мерки.
Иако регионалната соработка бележи напредок, на состанокот било истакнато дека економскиот потенцијал на регионот не е целосно искористен. Како следен чекор, заедно со Европската комисија и регионалните организации ќе се утврдува ограничен број најзначајни и најдобро документирани пречки, како и надлежните институции и роковите за нивно решавање. Предвидено е и подобрување на претходната размена на податоци, координацијата на надлежните служби и контролите врз основа на проценка на ризикот.
Заедничката порака на бизнис-заедницата била дека усогласувањето со европските стандарди треба да оди заедно со поедноставување на процедурите и постепено отворање на пазарните можности за компаниите од Западен Балкан.
На состанокот била презентирана и студијата „Мапирање на потенцијалните вредносни синџири преку регионална интеграција на економиите од Западен Балкан“, изработена преку ЕУ-проектот на КИФ. Според соопштението, студијата предизвикала голем интерес кај институциите и стопанствениците и би можела да им помогне во утврдувањето потенцијални пазари за пласман на производите.
Во Будва заседавал и Управниот одбор на КИФ, со присуство на претставници на Европската комисија. На седницата се разговарало за активностите во тековниот проект „Поддршка од ЕУ за КИФ во развој на заедничкиот регионален пазар“, како и за други проекти чија имплементација е во тек.







Коментари (0)
Коментарите за оваа објава се затворени.