Филипче наведе дека во прво одделение се запишани 3.000 деца помалку и тоа го нарече доказ дека во изминатата година се иселиле 3.000 млади семејства, кои продолжиле да живеат и да работат во ЕУ. Според него, на младите во Македонија им недостигаат европски стандарди и функционални институции, а власта ги остава без квалитетно образование, сигурност и доверба дека можат да изградат подобра иднина во сопствената држава.
Тој говореше на дебатата во Собранието „Извештаите на Европската комисија за владеење на правото во Република Северна Македонија – наоди и парламентарен надзор“. Неговата оценка е дека извештаите покажуваат отсуство на суштински напредок во која било област поврзана со европската интеграција во изминатите две и пол години. Наместо реформи и исполнување на европските стандарди, како резултат ги посочи изолацијата, корупцијата и невладеењето на правото.
Филипче предупреди дека оддалечувањето од ЕУ, покрај политички последици, ќе ја загрози и економската иднина на државата. Тој тврди дека економијата ќе заглави поради немањето пристап до европските фондови, додека државата се задолжува за тековни трошоци, плати и пензии.
Во таа насока ја критикуваше слабата реализација на капиталните проекти, големите долгови и каматите за домашното и странското задолжување. Според Филипче, граѓаните не гледаат корист од тоа задолжување, туку тонат во сиромаштија.
Зборувајќи за ветувањата на власта, Филипче рече дека веќе поминале три години и дека ветеното се покажало како лага. Тој ја обвини власта дека заштитата на националните интереси, идентитетот и јазикот ја користи како изговор за отсуството на напредок на европскиот пат, предупредувајќи на стагнација и ризик земјата да ја пропушти можноста за европска интеграција.






Коментари (0)
Коментарите за оваа објава се затворени.