Димитровски се сретна со министерот за култура на Либан, Хасан Саламе, и со специјалниот претставник на Владата на Република Кореја, Чанг Џе-бок. Разговорите за можната соработка ги опфатија културата, образованието и економијата, а соговорниците разменија мислења и за актуелните регионални и меѓународни геополитички и безбедносни состојби.
На тематскиот панел на XX Самит на Франкофонијата, Димитровски порача дека дијалогот, регионалната соработка и добрососедските односи се суштински предуслови за зацврстување на мирот и стабилноста за Македонија. Тој се заложи сите конфликти да се надминуваат по мирен пат, преку дијалог, и ја оцени Франкофонијата како значајна платформа за градење доверба, разбирање и заеднички решенија.
Димитровски учествуваше на 48. Министерска конференција и на XX Самит на Франкофонијата, одржани на 14 и 15 ноември во Пном Пен, под мотото „Реинвестирање во мирот за заеднички просперитет и трајна стабилност“. Самитот беше посветен на заедничката определба за мир, стабилност и просперитет и на улогата на Франкофонијата во соочувањето со современите глобални предизвици.
На отворањето се обратија кралот на Камбоџа, Нородом Сихамони, францускиот претседател Емануел Макрон, камбоџанскиот премиер Самдеч Моха Борвор Типадеј Хун Манет и генералната секретарка на Меѓународната организација на Франкофонијата, Луиз Мушикивабо. На самитот учествуваа и шефови на држави и влади и високи претставници на земјите членки и на меѓународни организации.







Коментари (0)
Коментарите за оваа објава се затворени.