Палатата, позната и како Хирбат ал-Мафџар, била изградена во првата половина на VIII век, во времето на Омејадскиот калифат. Мозаичниот под има 38 меѓусебно поврзани полиња, често нарекувани теписи. Нивните сложени геометриски и цветни мотиви се изработени од ситни камени парчиња, наречени тесери.
Еден од познатите прикази е Дрвото на животот, сместен во диванот, просторијата за приватни приеми во бањскиот комплекс. Во средината има големо дрво со плодови, веројатно дуња или јаболкница. Лево од него мирно пасат две газели, а десно лав напаѓа трета. Според „Archaeology World“, сцената најчесто се толкува како алегорија на мирот наспроти војната.
Мозаикот првпат бил ископуван во 1930-тите и 1940-тите години. Потоа со децении бил чуван под заштитни слоеви од платно и земја за да се спречат оштетувања од сонцето и временските влијанија.
За неговото зачувување бил спроведен повеќегодишен конзерваторски проект вреден 12 милиони долари, финансиран од Јапонија. Биле изградени заштитна покривна конструкција и подигнати патеки над урнатините. Целиот мозаичен под бил официјално претставен пред јавноста во октомври 2021 година, а не неодамна, како што се наведува во натписот што повторно се шири на социјалните мрежи.







Коментари (0)
Коментарите за оваа објава се затворени.