Според известувањата за пробивот во кои увид имал „TechCrunch“, украдени се податоци од возачки дозволи на 2.567 лица во Масачусетс, 3.430 во Јужна Каролина и 1.873 во Род Ајленд. Во документ поднесен во Илиноис се наведува дека се засегнати и жители на таа држава, но нивниот број допрва треба да се утврди. „Uber“ известил и возачи во Калифорнија, без да објави колкумина се погодени. „TechCrunch“ наведува дека се очекува бројот да расте со пристигнувањето на дополнителни известувања.
Во известувањата поднесени неделава до јавните обвинители на повеќе американски сојузни држави, меѓу кои и Калифорнија, „Uber“ навел дека добавувачот го известил за нападот на 9 октомври. Напаѓачите украле интерни податоци за најава, кои потоа ги искористиле за пристап до податоците на „Uber“. Компанијата соопштила дека потоа почнала да ги известува возачите чии лични податоци биле чувани кај добавувачот.
„TechCrunch“ го идентификува добавувачот како „Fireworks AI“, платформа што им овозможува на програмерите пристап и користење отворени модели на вештачка интелигенција. Портпарол на „Uber“ за медиумот потврдил дека известувањата до возачите се поврзани со безбедносен инцидент кај „Fireworks.ai“, кој имал пристап до дел од податоците на компанијата, а дополнителните прашања ги упатил до добавувачот.
„Uber“ не одговорил колку вкупно клиенти се засегнати, ниту колку возачи добиваат известувања за инцидентот. Портпарол на „Fireworks“ не одговорил на прашањата на „TechCrunch“.
„Fireworks“ во октомври пријави пробив при кој биле украдени податоци на негови клиенти, вклучително и податоци за наплата и дел од приватните збирки податоци за вештачка интелигенција. Компанијата „Notion“, која развива онлајн алатки за продуктивност, исто така потврди дека нејзини податоци биле украдени при нападот врз „Fireworks“.
„Fireworks“ го припиша нападот на финансиски мотивирана сајберкриминална група чија цел е да продава украдени токени за пристап до големи јазични модели, познати како „LLM“. Ниту една позната сајберкриминална група досега јавно не презела одговорност за оваа кражба.
Ова е втор познат пробив на податоци поврзан со „Uber“ годинава, според „TechCrunch“. Компанијата претходно пријави безбедносен инцидент во „Uber Freight“, нејзиниот оддел за камионски товарен превоз, за кој група што се занимава со изнуда тврдеше дека украла податоци.







Коментари (0)
Коментарите за оваа објава се затворени.