Двајцата министри разговараа и за организацијата и функционирањето на образовните системи во двете земји, како и за мерките за поттикнување на научноистражувачката дејност. Разменија идеи за можни заеднички иницијативи во образованието и науката.
Јаневска ја истакна досегашната јапонска поддршка преку стипендии за македонски студенти на јапонските универзитети и преку техничка модернизација и опремување на училиштата. Ја опиша Јапонија како долгогодишен стратешки партнер и изрази верување дека дел од разгледаните идеи наскоро ќе прераснат во конкретни проекти и активности.
Во Националниот институт за образовни политики на Јапонија, Јаневска се сретна со генералната директорка Мизуе Шиоми. Разменија искуства за наставните методи, подобрувањето на квалитетот на наставата и развојот на ученичките компетенции, со посебно внимание на креативното и критичкото размислување. Разговараа и за подготовката на учениците за меѓународното ПИСА-тестирање, на кое Јапонија, како што наведува Министерството, традиционално постигнува високи резултати.
На Универзитетот во Токио, министерката и неговиот претседател Теруо Фуџи ги разгледаа можностите за посилна соработка со македонските универзитети. Теми беа заедничкото учество во програмата „Хоризонт Европа“, размената на наставно-научен кадар и студенти и воспоставувањето нови академски партнерства.
За нови партнерски проекти Јаневска разговараше и со парламентарната заменик-министерка за надворешни работи Икуина Акико. Акико посочи дека Јапонската организација за надворешна трговија (ЈЕТРО) и Јапонската агенција за меѓународна соработка (ЈИЦА) ќе продолжат да работат на препознавање и развивање нови можности за соработка.
Посетата опфати и средби во македонската амбасада во Токио. Јаневска и вршителката на должност амбасадор Кристина Стојчевска се сретнаа со Казуја Оцука, поранешен амбасадор на Јапонија во Македонија, со македонски студенти и со средношколци од јапонско училиште кои го изучуваат македонскиот јазик.







Коментари (0)
Коментарите за оваа објава се затворени.