Во интервју за „Тема на денот“ на Сител, Филипче рече дека власта знаела кој е Давор Мацура и дека дозволувањето на влезот на Алта банка не може да се објасни со неинформираност на надлежните. Тој тврди дека влезот на банката е поврзан со политички концесии.
Филипче постави прашања за одговорноста на власта при преземањето на Стопанска банка Битола и за улогата на премиерот Христијан Мицкоски. Тој се повика на изјава на Трајко Славески дека Мицкоски бил консултиран и вклучен во процесот.
Филипче праша зошто премиерот и министерката за финансии на владина седница им укажале на јавните претпријатија, сопственици на акции во Стопанска банка Битола, да ги продадат на Алта банка. Тој отвори и прашања за нивната поврзаност со Алта банка во Белград.
За надзорната расправа Филипче најави список од триесетина лица. Меѓу оние што според него треба да бидат повикани ги наведе премиерот, претседателката на државата, министерката за финансии, гувернерот и вицегувернерите, како и претставници на банката и институциите.
Филипче посочи дека расправата треба да ги опфати потеклото на парите, трансакциите и постапувањето на Владата во врска со продажбата на акциите. Таа, според него, треба да трае колку што е потребно за да се постават прашањата, во рамките на временските ограничувања од Деловникот.







Коментари (0)
Коментарите за оваа објава се затворени.