Во емисијата „24 Анализа“, Тренчевска рече дека не биле проверени сопственикот Давор Мацура, неговата финансиска состојба и репутација, како и потеклото на капиталот. Таа тврди дека гувернерот во изјава рекол оти не знае кој е сопственикот и дека се осврнал само на финансиската состојба.
Тренчевска потсети дека СДСМ уште во декември 2025 година го отворил прашањето за сопственикот на Алта банка и околностите на постапката. Таа праша и дали Трајко Славевски бил именуван за гувернер за да ја спроведе операцијата, а сега оцени дека тој ја завршил.
Во врска со купувањето на банката, Тренчевска ги пренесе различните изјави за тоа дали премиерот бил информиран. Според неа, премиерот рекол дека гувернерот не го информирал, додека Славевски на прес-конференција потврдил дека премиерот бил запознаен. Таа додаде дека министерката за финансии рекла оти не била информирана.
Тренчевска тврдеше дека на Мацура претходно му било забрането да ја купи Адико банка во Австрија и дека имало забрана и во Црна Гора. Таа предупреди и на можноста Србија да ја преземе Стопанска банка АД Битола, поврзувајќи го тоа со пошироките сомнежи околу случајот.
Таа ја поврза политичката одговорност за влезот на Алта банка со власта и оцени дека Народната банка, иако правно независна, фактички е под влијание на ВМРО-ДПМНЕ. Побара институциите да дадат одговори за постапката.







Коментари (0)
Коментарите за оваа објава се затворени.