Меѓу мерките се државна помош за учество при купување прв стан, субвенционирани камати за млади брачни и вонбрачни парови и пристапни државни станови за долгорочно изнајмување. Предлогот опфаќа и 12 месеци платено родителско отсуство, од кое дел би можел да го користи и таткото.
Јанкоски предлага редовен месечен детски додаток за секое дете, со повисок износ за семејствата со пониски приходи, како и бесплатни градинки со доволно места и продолжено работно време. Предвидено е гарантирано згрижување за децата чии родители се вработени. Пакетот вклучува и намалување на персоналниот данок за родители, со дополнителни олеснувања за семејствата со три или повеќе деца.
За младите се предлагаат даночни стимулации за компаниите што ги вработуваат, поддршка за прво вработување и платена практична работа, како и поттикнување нови работни места надвор од Скопје. За повратниците се предвидуваат даночни поволности, помош при признавање дипломи и квалификации и поддршка за започнување сопствен бизнис.
Останатите предлози опфаќаат флексибилно работно време и работа од дома таму каде што природата на работата го дозволува тоа, како и национален пакет за поддршка при раѓање, со дополнителна помош за второ и трето дете. Пакетот предвидува и посебен демографски фонд за мерки поврзани со наталитетот, младите семејства и враќањето на иселениците, со јавно и транспарентно следење на потрошените средства и постигнатите резултати.
ЛДП ги повика сите политички партии, без оглед дали се на власт или во опозиција, да го поддржат предлогот и демографската обнова да ја третираат како заеднички национален приоритет.







Коментари (0)
Коментарите за оваа објава се затворени.