Мојсоска ги побара средствата за воспоставување заеднички оперативни тимови на МВР и центрите за социјална работа, чија цел е координирано постапување во случаите на семејно насилство. Левица ја обвини власта дека брзо ги придвижува законите што им служат на нејзините партиски интереси, а не ги разгледува решенијата што можат да спасат животи.
Потребата од таква заштита партијата ја образложи со тврдењето дека годинава во Македонија имало седум фемициди кои можеле да бидат спречени доколку надлежните институции постапувале навреме. Според Левица, наместо координирана помош, жртвите се соочуваат со бирократија, доцнење и отсуство на одговорност.
Како пример, Левица го наведе случајот со напад врз жена во парк во Карпош, за кој, според партијата, полицијата чекала 45 дена пред да го извести Центарот за социјална работа. Партијата тврди дека биле констатирани пропусти кај 39 полициски службеници, но дека сѐ уште нема кривична постапка, туку само дисциплински мерки.
За случајот во Богданци, Левица наведе дека жртвата го пријавила нападот на 30 септември, а МВР го известило Центарот за социјална работа по три дена. Според партијата, Центарот остварил средба со жртвата дури по пет дена, додека судските мерки против насилникот биле изречени по 16 дена.
Левица предупреди и на недостигот од засолништа за жртвите, тврдејќи дека во земјата, која има 80 општини, постојат само 11 шелтер-центри и дека тие не се функционални.
Мојсоска порача дека не може да се зборува за безбедност и НАТО-стандарди додека државата не успева да го заштити човечкиот живот. Левица ги критикуваше свеченостите и, според неа, празните пароли на ДПМНЕ, барајќи конкретни законски решенија, функционални институции и средства за заштита на жртвите.







Коментари (0)
Коментарите за оваа објава се затворени.