Координаторот на проектот Флорент Бајрами ги претстави наодите од следењето на еколошките мерки на Општината. Посебно внимание беше посветено на субвенционирањето инвертер-клими, планирањето на буџетот и транспарентноста при спроведувањето на општинските мерки. Во отворената дискусија учесниците поставуваа прашања и разменуваа мислења за приоритетите и средствата наменети за животната средина.
Претставниците на Општина Тетово беа поканети, но не беа во можност да присуствуваат. Здружението „За Тетово“, организатор на форумот, најави дека поставените прашања ќе ги вклучи во натамошната комуникација со општинските институции, со цел да поттикне дијалог и подобро информирање на граѓаните.
За загадувањето на воздухот во тетовскиот регион, професорот Менан Селими претстави проект за мерење на честичките „PM10“ и „PM2.5“. Преку визуелно прикажување на податоците и резултатите од мерењата, тој покажа како научните информации може да им се приближат на граѓаните на поразбирлив начин.
На форумот присуствуваа околу 30 претставници на граѓански организации, активни граѓани и претставници на медиумите. Настанот беше посветен на заштитата на животната средина, транспарентноста и активното учество на граѓаните во создавањето локални политики.
Здружението за граѓански развој „За Тетово“ го организираше форумот во просторот обезбеден од „Europe House Tetovo“, како дел од Програмата за поддршка на изборите, проект на Швајцарија што го спроведува Меѓународната фондација за изборни системи (ИФЕС).







Коментари (0)
Коментарите за оваа објава се затворени.