На панелот учествуваа Милана Ширковска, претседателка на Ученичката заедница, и Серафим Илиевски, заменик-претседател. Заедно со нив, училиштето го претставуваше и наставничката-советничка Елена Аспровска Божиновска.
На панелот учествуваше и Фатма Бајрам Аземовска, библиотекар советник од битолската Универзитетска библиотека „Св. Климент Охридски“. Таа зборуваше за пречките со кои се соочуваат децата кога сакаат да споделат што ги загрижува и за поддршката што им е потребна. Посебно се осврна на улогата на возрасните во градењето доверба, за децата да можат слободно да зборуваат и да се чувствуваат безбедно, прифатено и слушнато.
Дискусијата ја опфати и заштитата од насилство и дискриминација, со акцент на препознавањето ризици и важноста децата да знаат каде и кому можат да се обратат за помош и поддршка.
Од училиштето го нагласија значењето на вклучувањето на ученичките претставници: нивниот глас, мислење и искуство треба да бидат слушнати и почитувани кога се одлучува за прашања што ги засегаат. Слушањето и разбирањето на секое дете го посочија како заедничка одговорност.
Посебна тематска целина беше посветена на физичкото и менталното здравје на децата, пристапот до соодветна здравствена грижа, инклузијата и обезбедувањето еднакви можности за секое дете.
Во разговорот учествуваа и Сања Стаматова и Каролина Димеска од МВР Битола, дефектологот Анета Николовска, психологот Марија Филиповска и педијатарот Марија Торкова.
Настанот се одржа по повод 20 ноември, Светскиот ден на детето, во соработка и со поддршка од „Europe House“ Битола. Го отвори директорката на училиштето, Емилија Николовска Спировски.






Коментари (0)
Коментарите за оваа објава се затворени.