Претставата ги спротивстави размислувањата, навиките и вредностите на повеќе генерации, со посебен акцент на влијанието на современите медиуми, мобилните телефони и интернетот врз семејните односи. Низ хумор и ситуации од секојдневниот живот, таа ги обработи различните пристапи кон дигиталните технологии и тешкотиите во комуникацијата, но и потребата од поголема толеранција, внимание и поврзување.
Во музичкиот дел настапи училишниот хор, а неколку ученици изведоа македонски евергрини како дел од мултимедијалната претстава.
Пред уметничката програма беа доделени признанија за наставник на годината и „Ученик на генерацијата“, како и признанија за учениците што во текот на годината постигнале значајни резултати на натпревари, конкурси и други активности.
Директорката Ружица Икономова, обраќајќи им се на гостите, наставниците, родителите и учениците, ги опиша признанијата како потврда не само на индивидуалните успеси, туку и на вредностите што заеднички се градат во училиштето. Според неа, успехот не се мери само со бројки и резултати во извештаите, туку и со секојдневната поддршка што често останува незабележана.
Како примери Икономова ги наведе ученикот кој по месеци молчење се охрабрува да искаже поинакво мислење, наставничката што останува по часовите за дополнително објаснување и стручната соработничка која препознава дека важниот разговор не мора да биде за оценки. Во истиот контекст ги спомена служителот што прв ја отклучува и последен ја заклучува зградата и родителот што прашува како може да помогне, наместо само каква оценка добило детето.
Икономова нагласи дека секој треба да се чувствува прифатен, забележан и охрабрен, а грешките да бидат можност за учење и нов обид. Одговорноста кон името на Владо Кантарџиев, порача таа, е на сегашните генерации и се потврдува преку секојдневната работа, меѓусебниот однос и начинот на кој се пречекува секое дете.







Коментари (0)
Коментарите за оваа објава се затворени.