
Јованка Тренчевска
ПРАТЕНИЧКО ПРАШАЊЕ од пратеникот Јована Тренчевска, поставено на 50-та седница на Собранието на Република Северна Македонија одржана на 29 мај 2025 година Пратеничкото прашање гласи: Почитуван премиер, почитувани колеги пратеници, почитувани членови на Владата, трагедијата што се случи во дискотеката “Пулс“ во Кочани, нема никогаш да се заборави. Болката на семејствата на починатите и на настраданите нема никогаш да исчезне. Изгубивме 62 млади животи и над 200 млади девојки и момчиња се повредени, некои од нив имаат и трајни последици и траен инвалидитет. Ова не е статистичка бројка, тоа се млади животи и тие не смеат да бидат заборавени. Болката што ја преживеа Кочани не е само локална, таа е болка на целото општество. Ним не им е потребна само декларативна реторика, ќе го направиме тоа и тоа, нив е потребна помош сега, во овие моменти кога им е најтешко, кога е потребна грижа за повредените. Затоа, денес на овие пратенички прашања ќе потсетам за Предлог законот за поддршка на настраданите во несреќата во Кочани. Како пратеничка група на СДСМ и коалицијата, го поднесовме, прво во скратена постапка, но за жал, колегите пратеници од владејачкото мнозинство немаа слух. Овој Предлог закон не е пијар кампања, не е политичка калкулација, овој закон е реална потреба, на луѓето им е потребна реална помош, која во моментот ја немаат. Не е доволна помошта само преку Црвениот крст и тоа всушност не се пари на Владата, туку тоа се пари на граѓаните и на општествено одговорните компании. Владата никаде ја нема да помогне. Тие луѓе се секојдневно по доктори, по преврски, по потрага да ги обезбедат најдобрите услови за лекување на своите деца. Слушнавме од страна на премиерот дека е најавен проект Кочани 2030. Во ред, меѓутоа, каде е помошта сега. Овие граѓани немаат време да чекаат до 2030 година. Предлог законот на СДСМ е конкретен и вистинска помош. Затоа, минатата недела повторно го поднесовме Предлог законот за поддршка и рехабилитација на настраданите во несреќата во Кочани, овој пат по редовна постапка. Ги слушнавме сите коментари и забелешки од владејачкото мнозинство и се вметнати во самиот Предлог на закон. Оттука, моето трето прашање до премиерот е, дали овој пат како владејачко мнозинство ќе покажете политичка волја, овој Предлог закон конечно да се стави на дневен ред на собраниската седница и да добие поддршка како приоритет на општествена совест и морална обврска. Да се дебатира во собраниските комисии, пратениците од власта, доколку имаат забелешки, преку амандмани да се реагира.
Но на крајот на денот, законот да биде усвоен, да стаса поддршката и помошта до граѓаните на Кочани и околните градови од каде што имаме настрадани. И само на крај, во прашањето што беше поставено за мојот колега Оливер Спасовски, сакам дополнително да кажам, и она што го праша министерката за финансии, сакам дополнително да кажам, дека во несреќата, односно во пожарот во Модуларната болница во Тетово, со заклучок на Влада се одвоени по 30 илјади евра за секое семејство на настраданите. И, дополнително по илјада евра со Заклучок на Влада и задолжување, што беа исплатени од страна на Агенцијата за визуелни медиумски услуги, што значи дека во тој период како Влада, сме воделе грижа за семејствата на настраданите. Тоа го очекувам и од Влада, сега во најбрз можен период да помогне на семејствата на настраданите и на повредените од несреќата во Кочани. Прашањето го поставувам до претседателот на Владата на Република Северна Македонија.